– Eg likar jo når det er målinger som seier at eg er litt over snitt. Har jo litt konkurranseinstinkt, gliser Solveig Gulbrandsen.
Den mangeårige landslagsstjerna med mellom anna OL-gull på merittlista tek i alt ho har når ho bles i det forskjellige instrumenta på laben på NIH.
Vil ha utøvarar som deltok i OL i Beijing og Vancouver
Nå skal 42-åringen få svar på korleis lungehelsa er seks år etter at ho la opp som fotballspelar i heimklubben Kolbotn. Gulbrandsen føler at ho bidreg til eit viktig prosjekt.
– Det å kartlegge, og finne ut og få forska på korleis det har vore å vere toppidrettsutøvar. Og sjå kva slags skader, og kva ein kan unngå da og ta meir omsyn til er jo veldig viktig, seier Gulbrandsen.
I prosjektet vil forskarane ha inn utøvarar som deltok i sommar-OL i Beijing i 2008 som Gulbrandsen som del av fotballandslaget.
20 prosent av utøvarane som deltok i Beijing-OL i 2008 fekk påvist astma. Og heile 50 prosent av utøvarane som deltok i vinter-OL to år etter i Vancouver. Derfor er desse utøvarane spesielt interessante å undersøke.
![Bildet kan inneholde: væpne, helsevesen, sikkerhetshanske, helsepersonell, medisinsk assistent.](/forskning/forskingsnytt/bilder/solveig-3.jpg)
Mange av landslagsutøvarane som var aktive på 90-talet testa lungefunksjonen på Olympiatoppen og NIH i perioden 1993-2016. Desse vil forskarane gjerne teste igjen.
– Me ser på veldig mykje forskjellig, og håpar me kan bli litt klokare på kvifor nokon blir veldig plaga, medan andre ikkje blir det. Kanskje finn me ut at det er noko me kan gjere for å førebygge det, seier stipendiat på prosjektet, Monica Holmsve.
![Bildet kan inneholde: dataskjerm, datamaskin, data-tastatur, bord, personlig datamaskin.](/forskning/bilder/solveig-4.jpg)
Til nå har dei testa rett over 50 utøvarar, og målet er å få med 200 utøvarar til i løpet av det neste året.
To testdagar
Ho fortel at det ikkje er veldig tidkrevjande å delta. Deltakarane skal innom NIH på to testdagar. Den fyrste tar to timar og den andre ein time.
– Du må ikkje gjennom tunge fysiske testar på mølla som VO2-max i dette prosjektet, som kanskje nokon fryktar, smiler Holmsve.
Dei vil også ha inn utøvarar som ikkje har slitt med luftvegshelsa.
– Det er fordi me vil å sjå på forskjellane på dei utøvarane, og korleis utviklinga har vore etter at dei la opp, fortel Holmsve.
Er du i målgruppa og interessert i prosjektet?
Ta kontakt med:
Monica Holmsve
Lege og PHD-stipendiat ved Institutt for idrettsmedisinske fag
Tlf: 97 16 32 25
monicaho@nih.no
Trine Stensrud, professor Institutt for idrettsmedisinske fag
trins@nih.no