Gjennom studiet lærer studentane å leggje til rette for fysisk aktivitet, idrett, kroppsøving og friluftsliv (heretter: bevegelsesaktivitetar) til menneske med funksjonshemmingar. Studiet har ei pedagogisk og praksisnær tilnærming, der studentane skal engasjere seg i refleksjonar omkring det møtet som oppstår mellom pedagogen, bevegelsesaktiviteten og deltakaren, samt den konteksten som oppstår i dette møtet. Det blir først og fremst lagt vekt på sosiokulturelle og fenomenologiske forståingar av funksjonshemming. Etter avslutta studium skal studentane vere kvalifiserte for arbeid med menneske med funksjonshemmingar og bevegelsesaktivitetar innan skule, frivillige organisasjonar og rehabilitering.

Studentar som gjennomfører studiet og har faglærarutdanning i kroppsøving, vil kunne bruke tittelen spesialpedagog i kroppsøving.

Studiet blir gjennomført i samarbeid med Beitostølen helsesportsenter.

Kunnskap
Kandidaten:

• har brei kunnskap om idrettspedagogisk arbeid retta mot menneskje med funksjonshemmingar
• har kunnskap om ulike måtar å forstå funksjonshemming på
• kjenner til forskings- og utviklingsarbeid og relevante offentlege dokument på fagområdet fysisk aktivitet og funksjonshemming
• kan oppdatere sin kunnskap på fagområdet fysisk aktivitet og funksjonshemming
• har kunnskap om den historiske utviklinga av fagområdet fysisk aktivitet og funksjonshemming og kva for særtrekk og plass det har i samnfunnet

Ferdighet
Kandidaten:

• kan nytte fagleg kunnskap i tilrettelegging av bevegelsesaktivitetar for menneskje med funksjonshemmingar
• kan reflektere over eigen fagleg praksis og justere denne under rettleiing
• kan finne, vurdere og vise til informasjon og fagstoff, og framstille dette slik at det svarar på ei problemstilling
• kjenner til relevante idrettspedagogiske verktøy, teknikkar og uttrykksformer

Generell kompetanse
Kandidaten:

• har innsikt i etiske problemstillingar i idrettspedagogisk arbeid med menneskje med funksjonshemmingar
• kan planlegge og gjennomføre varierte arbeidsoppgåver og prosjekt, åleine og saman med andre
• kan munnleg, skriftleg og med andre relevante uttrykksformer formidle sentralt fagstoff
• kan utveksle synspunkt og erfaringar med andre som arbeider med idrettspedagogiske tiltak, og gjennom dette bidra til utvikling av god praksis

Studentane vil møte ulike former for undervisning og praksis. Undervisninga skjer både i plenum og i grupper der ein arbeider med sentrale tekstar og reflekterer over erfaringar som blir gjort i praksis. Det blir lagt stor vekt på studentaktive læringsformer. Det er difor forventa at studentane er tilstades også utanom den timeplanfesta undervisninga.

Opptakskrav

Gruppe 1:

• Søkjarar med bachelorgrad i idrettsvitskap inkl. første år bachelor idrettsvitskap/idrett årsstudium.
• Søkjarar med bachelorgrad i  helse- eller sosialfag samt første år bachelor idrettsvitskap/idrett årsstudium.

Gruppe 2:

• Søkjarar med to års høgare idrettsvitskapeleg utdanning, der det eine året er første år bachelor idrettsvitskap/idrett årsstudium.
• Søkjarar med første år bachelor idrettsvitskap/idrett årsstudium og eitt års pedagogisk utdanning.
• Søkjarar med bachelorgrad i  helse- eller sosialfag samt at det gjennom utdanning og/eller erfaring vert dokumentert kunnskap om idrettsfag.

Søkjarar i gruppe 1 skal rangerast foran søkjarar i gruppe 2.